Ужо традыцыяй для нашай навучальнай установы стала правядзенне краязнаўчага маршрута. Гісторыя гэтага мерапрыемства вядзе ў 2012 год, калі маршрут быў праведзены ўпершыню. 1 кастрычніка ў гэтым годзе таксама навучэнцы 1-ага курса сталі яго ўдзельнікамі. Прысвечаны ён Году народнага адзінства. Пачаўшы свой шлях ад парка імя М. Горкага, каманды пасля жэраб’ёўкі рушылі па вуліцы Першамайскай, багатай на гісторыю і славутасці. На станцыях іх чакалі памочнікі арганізатараў – навучэнцы старэйшых курсаў, якія выдавалі ўдзельнікам камплект заданняў. Кім быў заснаваны парк імя М. Горкага? Калі Магілёў атрымаў Магдэбурскае права? Як называўся Камсамольскі сквер раней? Хто з’яўляецца аўтарам памятнага знака на плошчы Адзінства? На гэтыя і іншыя пытанні спрабавалі адказаць удзельнікі маршрута.
Падарожжа па цэнтральнай вуліцы горада было пазнавальным як для ўраджэнцаў Магілёва, так і для тых, для каго ён на чатыры гады стане другім родным домам.
Выкладчыкі Бычкова А.У. і Шабліцкая Н.В.
